SAN FERNANDO CITY, LA UNION — Sumagmamano nga lot owners idiay Macagba Hills, Sitio 4, Barangay Biday, Ciudad ti San Fernando, La Union, iti kimmamang ditoy istasyon ti Bombo Radyo La Union kasaruno iti saan nga otorisado a panag-okupa kadagiti sanikua da.
Segun kadagiti nagreklamo, naklaat da lattan iti napartak a panangipasdek kadagiti bakante a daga da. Dagiti siguden nga alad ket naparot ken sinukatan dagiti suspek iti baro.
Binigbig dagiti nagreklamo iti nagan nga Ester Barrientos kas mastermind ken lider iti grupo. Para iti kinapatas ket maipaayan met ni Barrientos iti oras ken gundaway a paglibakan dagiti alegasyon.
Kabayatanna, aganay 93 nga ektaryan iti daga ti na-okupa. Ag-agumen pay iti grupo a kukua da amin a bakante a daga idiay Barangay Biday, nupay ti legal nga estado iti panangaklon ket agtaltalinaed a saan a beripikado.
Madanagan pay dagiti biktima agsipud ta nakaikabilen iti dakkel a tarpaulin kadagiti sanikua da nga addaan kadagiti sao a “BARRIENTOS PROPERTY, NO TRESPASSING”.
Gapo iti luksaw kabayatan ti komosyon ket inyangaw met a dinamag dagiti nagreklamo nu amangan bagien pay iti grupo ti Barangay Barrientos idiay ili iti Luna, agsipud ta agkanagan da iti apelyido. Positibo met nga inaklon manen dagiti suspek a kukua da amin a bakante a daga idiay Barrientos, Luna.
Impadanonen dagiti apektado a residente ti reklamo da iti Barangay ken Office of the City Mayor, kasta met a nangipatulod dan iti surat sadiay Office of the Governor, tapno kiddawen a makiballaet iti problema.
Laksid dagitoy nga addang ket agingga ita awan latta iti napagtulagan a resolusyon, ken kinuna dagiti biktima nga agtultuloy da latta nga urayen iti tignay manipud kadagiti otoridad.
Kabayatan iti panaglabas ti aldaw ket madanagan dagiti lot owners nga ad-adu pay dagiti agumen a daga dagiti suspek. Impadamag da met a mailaklakon dagitoy iti nababa a kantidad ken imballaag kadagiti maallukoy a gumatang ti posible a masakbayan a problema kadagiti agbalin a titulo.
Dagitoy nga alegasyon ket agtaltalinaed a saan pay a beripikado ken maur-uray pay dagiti legal nga addang ken imbestigasyon. Dagiti pakabigbigan ti rehistrado a property owners, beddeng ken legal nga estado ti mapapati a 93 nga ektarya, ken ti basaran iti panagtagikua, ket kasapulan pay iti umiso a kumpirmasyon kadagiti maiyannatop a legal ken maseknan nga ahensya ti gobierno.
