Pimmusay dagiti dua a mannalon nga agtawen iti 69 ken 49, agpada a residente ti Barangay Datal Anggas, kalpasan a malmes sadiay Glamang River, Barangay Anggas, Alabel, Sarangani Province, kabayatan iti panangisayangkat ti ritwal mainaig iti problema ti daga.
Nagtulag dagiti dua nga isayangkat ti nasao a ritwal idi Oktubre 16 a kas solusyon iti problema. Agpinnapaut dagitoy iti uneg ti danum, kas maibasar iti kadawyan a pamay-an ti nagkauna a tradisyon.
Nupay kasta, awan iti timmakdang kadakuada agingga nadanon da iti nasurok sangapulo a minutos iti uneg ti danum sakbay a nalmes.
Dagos a naiturong dagitoy iti balay-pagagasan sadiay General Santos City, ngem agpada da a naideklara kas dead-on-arrival.
Kabayatanna, nagpanawagan met dagiti mangibagi iti katutubo iti naun-uneg pay nga imbestigasyon. Impaganetget da pay iti kinapateg iti panagraem iti kultura ken ti nakapia a wagas iti panagrisut ti tunggal problema iti kagimongan.
