Pinirmaan ni Presidente Ferdinand Marcos Jr. iti Executive Order (EO) No. 129 tapnu temporario a maipangato ti Minimum Access Volume (MAV) iti importasyon ti mais.
Iti bileg daitoy, nanayunan ti 280,000 metric tons iti agraraira nga alokasyon tapnu dumanon ti pakabuklan 500,000 metric tons.
Inaramid ti daitoy nga addang tapnu sungbatan iti kinakurang ti duyaw a mais a kangrunaan a sangkap iti panagaramid ti feeds.
Tarigagay daitoy a makissayan ti epekto ti nababa nga apit ken pangta ti dakes a paniempo iti agrikultura.
Dakkel iti tulong daitoy tapnu masigurado iti agtultuloy a suplay para kadagiti feed manufacturer ken livestock raisers.
Gapu iti daitoy, manamnama a maliklikan iti panagngato ti presyo dagiti makan ti ayop.
Kangrunaan a tarigagay ti administrasyon a mapagtalinaed iti kinatibker ti merkado ken maprotektahan iti gatad ti karne.
Binilinan na iti Minimum Access Volume (MAV) Management Committee a mangbukel ti allagaden iti las-ud ti 30 nga aldaw manipud iti panangipatungpal ti daitoy, pakairamanan ti daitoy ti patas a mekanismo iti distribusyon para kadagiti lehitimo a sektor.
