“Don’t panic.” Daytoy iti nagbalin a panawagan ni Presidente Ferdinand “Bongbong” Marcos Jr. iti publiko kasaruno ti agtultuloy a panagkapsot iti balor ti piso kontra dolyar.
Nangiruar ti waragawag iti Presidente kalpasan a simmadsad iti exchange rate ti baro a pakasaritaan a record low, kalpasan a nagrikep iti nasurok ₱64 ti maysa a dolyar.
Maibasar iti report, inlawlawag ni Presidente Marcos dagiti sumaganad a punto tapno mapag-kalma iti sitwasyon:
Imbaga ti Presidente a ti panagsuwek ti balor ti piso ket saan a gapwanan iti lokal a krisis nudiket epekto iti agtultuloy a panagngato ti presyo ti langis ken petrolyo iti global market, a pinakaru iti agraraira a tensyon idiay Middle East ken panagpigsa ti dolyar ti Estados Unidos.
Siniguro ti Presidente nga adda iti umiso a “tools” ken wagas ti gobyerno tapno depensaan iti lokal a kuwarta.
Impaganetget na pay nga agtaltalinaed a “healthy” wenno adda iti nasayaat a kasasaad iti foreign exchange reserves ti Pilipinas nga us-usaren ti Bangko Sentral ng Pilipinas (BSP) tapno alay-ayan iti piso.
Tapno makissayan kunana iti buteng ken panagamak dagiti umili iti posible nga epekto na iti inflation, nagkari iti administrasyon a tutukan na iti panang-siguro nga umdas dagiti suplay ken maipababa ti presyo ti taraon ken kangrunaan a gagatangen iti lokal a merkado.
Laksid iti panagamak iti sumagmamano nga ekonomista seknan iti panagngato ti import costs (kas ti krudo), tinakderan iti Palasyo a kontrolado ken banbantayan iti economic team ti taray iti trading tapno maprotektaran ti pagimbagan dagiti ordinaryo nga umili ken vulnerable sectors.
