Kinuwestiyon manen ni Vice President Sara Duterte iti singasing ti gobyerno a panagusar iti balde kas panagsagana iti posible nga epekto ti El Niño phenomenon ditoy pagilian.
Iti pannakitaripnong na kadagiti overseas Filipino worker wenno OFW idiay Hong Kong idi kalman, Domingo, Nobyembre 8, imbaga ni Duterte a saan nga umanay iti panangisagana dagiti balde tapno makaurnong iti danum ti tudo, nangruna nu agbanay iti nakaru a tikag iti namnamaen nga epekto ti El Niño.
Segun iti Bise Presidente, rumbeng nga ipaayan atensiyon ti gobyerno iti mas nalawlawag a panagsagana, partikular ti panangsiguro nga umdas iti suplay ti taraon iti panawen a possible ti panagkurang ti danum.
Impaganetget na pay a maibasar iti ballaag dagiti eksperto, posible nga umabot iti drought wenno nakaru a kinatikag iti epekto ti El Niño, ken posible a mabbatan dagiti pagal-alaan ti danum.
Imbaga ti bise presidente, kasapolan nga adda konkreto a plano ti gobyerno tapno masungbatan iti possible nga epekto daytoy iti suplay ti taraon ken pagbiagan dagiti Pilipino.
Iti waragawag ti Bise Presidente ket kasaruno iti singasing ni Presidente Ferdinand Marcos Jr. nga agsagana iti balde tapno makaurnong ti danum ti tudo kas paset iti panagsagana iti epekto ti El Niño.
