Impaganetget ni House Prosecution Member ken Representative Terry Ridon nga awanen ti lugar ti depensa tapnu agusar ti aniaman a delaying tactics mainaig iti impeachment trial ni Bise Presidente Sara Duterte.
Segun kenni Ridon, maibilang a pormal a deadline ti schedule nga inruar ti Impeachment Court isu a kasapulan nga iyanay ti defense team iti orasda iti panangiparang kadagiti ebidensia tapno masuppiat dagiti indatag ti prosecution. Immunan nga inruar ti korte ti schedule ti hearing para iti intero a bulan babaen ti advisory a napetsaan iti Oktubre 13.
Maibasar iti opisial a dokumento ti Impeachment Court, insubmitiren ti kampo ti depensa iti listaan dagiti 25 a testigo a kayatda nga isango iti trial.
Nupay kasta, immunan nga immatras kas panagbalin nga umuna a testigo ti political ken constitutional law professor a ni Ralph Sarmiento.
Sakbay daytoy, inwaragawag ni House Deputy Speaker ken Iloilo 1st District Representative Janette Garin ti pammatina nga us-usaren ti kampo ni Duterte ti “3D tactic” wenno “Delay, Delay, and Divert” strategy iti nasao a kaso.
Manamnama a maliklikan ti nasao nga estratehia tapno saan a malapdan ti Impeachment Court a mangipaulog iti patas ken naintiempuan a desision.
