Agsagsaganan dagiti abogado ken human rights volunteers a mangipila iti piyansa para kadagiti rallyista a naaresto sadiay Sucat, Muntinlupa City, iti kangitingitan ti pannakalukat ti 49th ASEAN Summit ditoy pagilian.

Iti eksklusibo nga interview ti Bombo Radyo Philippines kenni Legal Counsel Atty. Ephraim Cortez, inwaragawagna a kangrunaan itan nga agtartrabaho ti grupoda a mangileppas iti salaysay dagiti naaresto kas paset ti panagsagana iti sumaruno nga addangda.

Kinunana, saan pay a nairekord amin nga salaysay isu a maal-ala pay laeng dagitoy, kagiddan ti pannakaisagana dagiti dokumento a kasapulan para iti piyansa.

partrikular nga ikikkan prayoridad dagiti abogado, paralegal ken volunteer for human rights dagiti menor de edad a karaman kadagiti naibalud.

Kabayatanna, kinuwestyun met ni Cortez ti nagbalin nga aksyon dagiti otoridad iti protesta, partikular ti panangharang kadagiti rallyista ken panag-aresto.

Impaganetget ti abogado, saan a kayat a sawen ti maximum tolerance a manglapped kadagiti tattao nga agmartsa ken mangiyebkas kadagiti reklamoda, nangruna nu awan met ti araramiden dagitoy a kinaranggas.

Kinuna napay a rumbeng ketdi a raemen dagiti otoridad ti karbengan ti publiko a mangisayangkat kadagiti natalna a protesta, a maitunos iti linteg.

Malagip a napasamak ti pannakatiliw sadiay Sucat People’s Park idi Nobiembre 15, bayat ti panangisayangkat dagiti delegado manipud Southern Tagalog iti protest caravan nga agturong kuma kadagiti tignay-protesta iti Metro Manila mainaig iti ASEAN Summit.

Inturong iti Camp bagong diwa idiay taguig ti nasurok a 200 a naaresto. Karaman kadagiti naipadamag a naibalud ti 19 a menor de edad, a sigun kadagiti report ket naasikaso idi agangay babaen ti tulong ti Department of Social Welfare and Development.

Kabayatanna, impaganetget met ti Philippine National Police a nangipatungpal dagiti personnels iti maximum tolerance ken kinasapulan nga agtignay tapno mataginayon ti urnos ken seguridad iti baet dagiti tignay-protesta.

Iti sidong ti Batas Pambansa 880 wenno Public Assembly Act of 1985, masapul nga usaren dagiti pulis ti kangatuan a lebel ti panagteppel bayat ti panagtitipon ti publiko ken iti pannakaisayangkat ti dispersal.

Agtultuloy ti panangasikaso dagiti abogado kadagiti salaysay ken panagsagana para iti piyansa, nangruna kadagiti menor de edad a karaman kadagiti naidetine.