Pinaglibakan ti Armed Forces of the Philippines (AFP) iti nagbalin nga akusasion ni sigud nga Ilocos Sur Governor Luis “Chavit” Singson nga maipagarup a maus-usar dagiti sumagmamano a militar tapno salakniban iti interes dagiti pulitiko bayat a sagsagabaen dagiti kadawyan nga umili iti epekto ti korapsion kas iti panagngato ti presio dagiti tagilako, panagkapsut ti piso, panagdakkel ti utang ti pagilian, ken panagbagsak dagiti foreign investments.
Segun kenni AFP spokesperson Colonel Francel Margareth Padilla, agtaltalinaed a natibker ti AFP iti panangsurot iti mandato ti 1987 Constitution, partikular iti nakalanad a probision a ti ”Civilian authority” iti agnanayon nga agpannuray iti militar.
Nupay supsuportaran ti AFP iti adbokasiya para ti nasayaat a panangimaton ken kontra korapsion – dagiti saritaan maipaan ti gobierno, panagkuarta, ken polisiya iti ekonomiya ket sakop dagiti korte ken civilian oversight bodies, ken saan nga iti militar.
Maipalagip nga inakusaran ni Singson iti militar nga adda dagiti sumagmamano a nangangato nga opisial iti maipagarup a naikkan ti kuarta, saan a tapno tulungan no di ket pagulimeken.
Inallukoy na met ni AFP Chief of Staff General Romeo Brawner Jr. a tumakder kontra ti panagkunniber.
Nagpakdaar ni Padilla kontra iti panawagan nga iraman iti militar iti partisan politics a makadadael iti integridad ti institusion.
Innayon na pay a napateg iti panagbalin a kritikal ti publiko kangrunaan iti panawen a kasapulan ti pagilian iti panagkaykaysa, partikular iti sango dagiti karit idiay West Philippine Sea.###
