BR LA UNION – Nainget a pinaglibakan ken kinondenar ti liderato ti Armed Forces of the Philippines (AFP) dagiti malisyoso nga alegasyon nga agwar-waras online seknan iti maipagarop a ₱15 billion military ghost projects” manipud 2023 agingga 2025.
Segun kenni AFP Public Affairs Office (PAO) Chief Col. Xerxes Trinidad, kina-ulbod amin dagitoy nga alegasiyon, irresponsable, ken nalawag a panggep laeng a dadaelen ti institusyon ken ti liderato daytoy.
Inlawlawag ni Trinidad nga awan ti maipatpatungpal wenno mapon-ponduan nga anyaman a proyekto ti imprastruktura.
Segun iti AFP Official, amin a pasilidad ti militar iti sidong ti programa nga Tatag ng Imprastraktura para sa Kapayapaan at Seguridad (TIKAS) ket pinonduan ken ipat-patungpal ti Department of Public Works and Highways (DPWH).
Nupay irekomendar ti AFP dagiti proyekto a maibasar iti operational needs kas iti barracks, training facilities, ken headquarters buildings ngem direkta a maited ti pondo iti DPWH.
Awaten laeng ti AFP dagiti nalpas a proyekto ken saan a mairaman iti proseso ti panaggatang, engineering, wenno auditing.
Innayon ti AFP a ti “completion” a nadakamat kadagiti misleading reports ket mangdakdakamat laeng iti nalpas a paset ti konstruksiyon para iti partikular a tawen, ken saan a kayat a sawen a nalpasen ti sibubukel a proyekto.
Ti panangawag iti nalpas a paset kas “ghost project” ket nalawag a saan nga umno a panangipalaag iti proseso ti panag-budget ti gobyerno iti imprastruktura.
Inallokoy ti AFP iti publiko, nangruna dagiti kakadua da iti media, nga agannad ken responsable iti panangibinglay ti impormasyon online.
Ti panagsaknap dagiti awan nakaibatayanna nga alegasyon ket saan laeng a mangdadael iti reputasyon, ngem ketdi iti panagtalek ti publiko kadagiti institusyon nga agserbi para iti talna ken kinatalged.
Agtalinaed a natibker ti AFP a mangitandudo iti transparency, integridad, ken accountability iti amin nga aktibidad daytoy.
Saan nga agpa-apekto ti militar iti awan basaran a panangpadakes maibusor iti pagrebbengan ken panagserbi kadagiti umili.
