LA UNION – Nakabalod ita ti ag-asawa nga inarestar dagiti otoridad kalpasan a makumpiskaran ti maipagarop marijuana idiay Aringay, La Union.
Nabigbig iti ag-asawa nga isuda Joey ken Ma. Luisa Medina, addaan ti umno nga edad, agpada nga drug surrenderee, ken residente ti Barangay Samara iti nasao a lugar.
Immuna ditoy, inserbi ti Aringay Police Station, Philippine Drug Enforcement Agency Regional Office 1, ken dadduma pay nga unit ti kapulisan ti search warrant nga impaulog ni Judge Ethelwolda Haravata, ti Regional Trial Court Branch 32 idiay ili ti Agoo, La Union.
Naala manipud iti pagtaengan dagitoy ti (3) sachet ti maipagarop a marijuana fruiting tops.
Segun kenni PSI Daniel Banan, officer in charge ti Aringay PNP, nabayagdan a subsubaybayan iti ag-asawa no sadino maipagarop a nagsubli dagitoy iti panagaramat iti maipawil nga agas.
Maisagsagana metten ti kaso a panaglabsing iti RA 9165 wenno Comprehensive Dangerous Drugs Act of 2002 kontra iti ag-asawa a suspek.
