Timmakder kontra iti kinaranggas ken armado nga impluwensya ti CPP (Communist Party of the Philippines)-NPA (New People’s Army)-NDF (National Democratic Front of the Philippines) (CPP-NPA-NDF) iti pakabuklan a 28,415 barangay iti 60 a probinsia ti intero a pagilian kasaruno ti deklarasyon dagitoy iti sidong ti Stable Internal Peace and Security (SIPS) status.
Segun kenni National Task Force to End Local Communist Armed Conflict (NTF-ELCAC) Deputy Director for Operations Rodrigo “Rhod” Lutao, ipakpakita ti nalawa a sakop ti SIPS iti agtultuloy a pannakaawan ti iggem dagiti rebelde a grupo, bayat nga ad-adda a pilpilien dagiti komunidad iti kinakapia, naurnos a gobierno, ken kinarang-ay.
Kagiddan daitoy, dimmanon iti P44.90 bilyon iti puunan ti gobierno para iti Barangay Development Program (BDP) kadagiti 5,638 barangay, a sigud nga apektado ti gubat nga ingubuay ti insurhensya.
Naitukon iti nasao a pondo iti panagpaaramid kadagiti kalsada, silid-pagadalan, water facility, public street lights, ken dagiti center para iti salun-at tapnu masigurado iti direkta a serbisyo ti gobyerno kadagiti umili.
Nagwaragawag met ni Assistant Director General Cornelio H. Valencia Jr. a nakapamaysa ita ti task force iti panagpatibker dagiti programa a “Build Peace Better” tapnu permanente a maitandudo iti kinakapia ken kinarang-ay kadagiti komunidad.
