BR LA UNION – Imbilin ni Presidente Ferdinand Marcos Jr. ti nadaras a panangibunong ti ₱8 billion a pondo kadagiti nasurok 42,000 a barangay iti intero a pagilian tapno matulongan dagiti lokal a gobierno a mangsango iti epekto ti krisis idiay Middle East.
Segun kenni Executive Secretary Ralph Recto, nangrugi ti rollout ti programa a “Bawat Barangay Makikinabang” idi Mach 24 nga awan ti pormal nga anunsiyo.
Babaen daytoy, makaawat ti tunggal barangay iti ₱200,000 para kadagiti proyekto Iti edukasyon, pang-komunidad, ken livelihood wenno pagbiagan.
Iti umuna a batch, 5,000 a barangay ti nakaawaten iti pondo. Dagiti naudi a benepisyaryo ket dagiti barangay idiay Pilar, Bataan a personal nga inatendaran ti Presidente iti distribusyon.
Maibasar iti pagannurotan ti programa, mabalin nga usaren ti kagudwa ti pondo wenno P100,000 para iti seguridad ken infrastructure projects kas iti street lights, patrol vehicles, CCTV, ken generators para kadagiti health centers ken evacuation centers.
Idinto a ti nabati a P100,000 ket mailatang iti “finisher program” para kadagiti estudyante nga adda iti maudi a tawen ti kolehiyo tapno masigurado a makaturposda iti laksid ti epekto ti krisis.
Mapattapatta nga umabot iti 200,000 nga agturpos nga estudyante ti matulongan ti programa.
Kinuna ni Recto a ranta ti nasao nga addang a direkta a mapapigsa dagiti barangay kas frontliners iti komunidad ken siguraduen nga adda kabaelan da a mangsungbat a dagus kadagiti parikut.
Tapno mapapartak ti distribusyon, nakitinnulong ti Opisina ti Presidente iti League of Barangays iti Pilipinas para iti mobilisasyon ken pannakamonitor ti pannakausar ti pondo.
Idaulwan ti Department of the Interior and Local Government iti implementasyon tapno masigurado a ti pannakausar ti pondo ket maitunos kadagiti pagannurotan iti panagbadyet, accounting, ken auditing .
Target ti gobyerno a maileppas ti distribusyon sakbay nga agtapos ti Hunyo 2026 ken mausar amin a pondo sakbay nga agleppas ti tawen.
