BR LA UNION – Pinadayawan ti Department of the Interior and Local Government (DILG) ti Provincial Government of La Union kas maysa kadagiti sangapulo a lokal a gobierno ditoy pagilian a nabigbig iti dakkel a kontribusyon na iti pannakapreserba ken pannakasalaknib ti West Philippine Sea (WPS).
Sipapannakkel nga inawat ni La Union Governor Mario Eduardo C. Ortega ti plake a “PAGKILALA LA UNION”, kaduana da First District Board Members a ni Chary Nisce ken dagiti Second District Board Member a da Martin De Guzman, Teresita “Tess” Garcia, ken Ruperto Rillera Jr., kabayatan ti “Bayanihan para sa Kaunlarang Dagat ng Pilipinas” Summit idi Hulyo 23, 2026 idiay Lingayen, Pangasinan.
Naited ti pammigbig kagiddan ti pannakalagip ti maika-10 nga anibersaryo ti panagballigi ti Pilipinas iti West Philippine Sea Arbitral Award.
Nabigbig ti probinsiya gapu kadagiti programa para iti proteksiyon ken panang-depensa iti WPS, karaman ti pannakaipasdek ti West Philippine Sea Council ken pannakaadaptar dagiti ordinansa ken resolusyon a mangitantandudo ti pannakasalaknib ti maritime domain ti pagilian.
Segun kenni Assistant Secretary for International Relations Lilian De Leon, ti La Union ti kaunaan a probinsiya iti Pilipinas a nangipasdek ti West Philippine Sea Council, nga agserserbi a modelo para kadagiti dadduma a lokal a gobierno.
Maibilang a dakkel a gapuanan ti probinsiya ti pannakabigbig gapu iti agtultuloy a pannakitinnulongna iti gobiyerno nasyunal, pannakikaysa kadagiti coastal local government units (LGUs), ken suporta iti komunidad a naapektaran kadagiti isyu iti West Philippine Sea.
Ti award ket personal nga inyawat ni DILG Secretary Juanito Victor Remulla, Pangasinan Governor Ramon Guico III, National Security Council Assistant Director General for Partnerships and Engagements, DILG Undersecretary for Local Government Marlo L. Iringan, National Task Force for the West Philippine Sea (NTF-WPS) Deputy Administrator James Layug, Office of Civil Defense Assistant Secretary ken Deputy Administrator for Operations Laurence Mina.
Malaksid iti La Union, pinadayawan pay ti DILG dagiti probinsiya ti Pangasinan, Ilocos Sur, Ilocos Norte, Zambales, Bataan, Occidental Mindoro, Palawan, Batangas, ken Batanes.
