BR LA UNION – Nabigbig kas Best Actor in a Leading Role ita a tawen iti Cinemalaya ni Martin del Rosario para iti inakem na a papel kas Neil iti pelikula a “Tayo Lang ang Nakakaalam.”
Inawat ni Martin ti tropeyo kabayatan ti awarding ceremony a naangay iti Shangri-La Plaza idiay siyudad ti Mandaluyong.
Iti inakem na a papel iti pelikula ket kas maysa a bakla a mangay-aywan iti partner na a ni Bong, nga addaan ti HIV.
Pinili dagiti dua a pagtalinaeden a pribado ti relasyonda gapu iti buteng nga husgaran iti kommunidad.
Iti acceptance speech na, nagyaman ni Martin iti intero a cast ken crew ti pelikula ken imbagana a daytoy ti umuna a Cinemalaya Best Actor award-na.
Impaganetgetna pay ti mensahe ti pelikula maipapan kadagiti karit a sangsangwen ti LGBTQ+ community ken inallokoyna iti publiko a gibusanen ti stigma kontra iti LGBT ken tattao nga agbibiag nga addaan ti HIV.
Kabayatanna, nagun-od met ti cast a pakairamanan da Epy Quizon, Yayo Aguila, ken Miguel Ordon ti pammadayaw para iti Best Ensemble Performance.
Nangabak pay ti “Tayo Lang ang Nakakaalam” iti Best Cinematography ken Best Sound categories.
