LA UNION – Agtultuloy pay iti imbestigasyon tipulisya iti napasamak a panagtakaw dagiti suspek nga nabirngasan a ‘termite gang’ iti mobile phone outlet ken kaabay na a money remittance outlet idiay Barangay Ortiz iti ili ti Naguilian, La Union.
Naamuan ti Bombo Radyo manipud iti Naguilian Police, nadiskobre iti pannakatakaw dagiti kuarta ken dagiti produkto iti nadakamat nga pasdek idi malukatan ti maysa nga empleyado ti mobile phone outlet a pagpapaayan na a pagtagilakuan agarop alas-9:00 idi bigat kalman.
Maibasar iti imbestigasyon ti pulisya, kinarayam dagiti suspek ti imburnal ken nagkali ti abot iti uneg ti daga nga agturong iti money remittance outlet kasaruno iti panangdadaelda iti sementado a pader nga bimmallaet iti nadakamat a pagtagilakuan dagiti cellphones.
Umabot iti P44,000 cash iti innala dagiti agtatakaw manipud iti vault ti money remittance outlet karaman ti dadduma pay nga alikamen a saan pay nga ammo iti gatad na.
Dumanon iti P262,562 a balor dagiti cellphones, laptop, ken dadduma pay nga accesories; kabilang ti P39,468 cash a collection ti natakaw manipud met iti mobile phone outlet.
Iti agdama, ad-adalen metten ti pulisya dagiti nakalap nga ebidensya maniud iti nasao a lugar para iti posibilidad a mabigbig dagiti suspek.
