Agarup 500,000 a double ken multiple voter registrants ti maikkat iti sistema ti Commission on Elections (Comelec).
Daytoy ket kalpasan a nakagun-odda kadagiti ‘hits’ manipud iti Automated Fingerprint Identification System (AFIS) ti poll body.
Segun kenni Comelec chairman George Erwin Garcia, nairehistro ti double ken multiple voter entries manipud Hulio 15 agingga iti Setiembre 30, maudi nga aldaw ti panagrehistro dagiti botante para iti 2025 midterm elections.
Mainaig iti daytoy, mangangay ti election registration board iti special meeting ita a bulan sakbay a maileppas ti listaan dagiti botante ita a Nobiembre.
Impakdaar pay ni Garcia a ti panagrehistro iti adu a daras ket maysa nga election offense a katupag ti 1 agingga iti 6 a tawen a pannakaibalud ti double registrant.
