Natay iti dua a tattao a naglugan ti motorsiklo kalpasan a naka-dinnungpar da iti maysa a kotse iti kawatiwatan ti national highway idiay Barangay Dili, Bauang, La Union.
Napasamak ti aksidente pasado alas 2:00 ti parbangon idi Hulyo 2, 2023.
Dagiti biktima nga indeklara ni Dr. Erwill Nunan ti RHU-Bauang a dead-on-the spot ket isuda: Jesus Carlo Malicsi, 23 anyos, baro, service crew, nagmaneho ti motorsiklo, residente ti #28 Lower P. Burgos, Baguio City ken Brenelie Gryle Kodiamat, 21-anyos, balasang ken residente ti #09 APB Paltingan, Ambiong, La Trinidad, Benguet.
Iti kotse ket manmanehuen ni Salvador Icad, 52-anyos, residente ti Ubudan Alno, La Trinidad, Benguet.
Maibasar iti inisyal nga imbestigasyon ti Bauang PNP, iti motorsiklo ket dumaldalyasat iti kalsada nga agturong ti pa-amianan a direksyon idinto a ti nalabbaga a kotse ket agturturong iti paabagatan a direksyon, idi maipagarop nga immagaw ti linya iti motorsiklo a nakaigapwan ti aksidente.
Kas resulta, naipurwak dagiti naglugan ti motorsiklo ken inatalan pay iti sumarsaruno ken agpa-amianan a closed van ken dagus a naglibas daytoy, segun kadagiti nakaimatang a residente nga isuda Eduardo Collaton ken Jessica Fontanilla.
Naamwan a naglibas ni Icad kalpasan ti insidente ngem personal met laeng a simmuko kadagiti otoridad.
Bayat a ti closed van driver a saan a nabigbig ket naglibas kalpasan ti insidente.
Maibasar pay iti report, awan ti narekober dagiti otoridad a driver’s license ni Malicsi ken maysa laeng a helmet ti narekobre iti nakapasamakan ti aksidente.
Kabayatanna, imbaga ti kabsat a babai iti natay a motorcycle rider a ni Joelyn Amon a dagiti dua ket imminom ti nasanger sakbay a nagbiyahe dagitoy.
Iti bangkay dagiti biktima ket agpadan a naiyawid iti pagtaenganda idiay Baguio ken La Trinidad Benguet.
