LA UNION – Adda itan iti salwad ti pulisya dagiti agkabsat a pimmatay iti maysa a lalaki idiay ili ti Luna, La Union.
Iti pannakiuman ti Bombo Radyo kenni C/Ins. Daniel Banan, hepe ti Luna Police Station, kinunana a boluntaryo a simmuko ken immasideg kadakuada dagiti agkabsat a suspek nga isuda Marvin, 20 ken Jonathan, 18, ti Barangay Paagan, Santol, La Union.
Sigun pay kenni Banan, inaklon pay ti agkabsat nga isuda iti pimmatay kenni Eugenio Bautista ken imbellengda iti igid ti kalsada ti bangakay daytoy idiay Barangay Carisquis, Luna.
Inyestorya pay kadagiti suspek a nasair dagitoy kalpasan a nagkedked a saan a nagbayad ti ininumda nga arak ti biktima.
Maipagarup a kinabil ken tinupakanda pay iti dakkel a bato ti biktima nga isu ti makagapu iti pannakatay daytoy.
Immuna iti daytoy, nasarakan dagiti residente ti kadardara a bagi ti biktima a nakadata ken nagaburan pay daytoy iti bubbulong ken sangsanga ti kayo.
