BR LA UNION – Nangidatag ni Agriculture Secretary Francisco Tiu-Laurel Jr. iti cyberlibel complaint idiay Makati City Prosecutor’s Office kontra kenni Atty. Levi Baligod ken sigud a Ako Bicol Party-list Representative Zaldy Co.
Segun iti sekretaryo, mainaig daytoy iti panang-akusar da kenkuana iti isyu ti embezzlement money a maipagarup a naited kadagiti sumagmamano nga indibidual.
Ti nasao nga addang ket kasaruno kadagiti statement ni Co idi napan a tawen a nangiraman iti Department of Agriculture kadagiti alegasyon nga anomalya iti panagangkat ti bagas, sibuyas, asukar, ken ikan, banag a nainget nga inlibak ni Tiu-Laurel dagiti pammabasol, nga impaganetgetna nga awan ti basaran.
Kinuna ti sekretaryo a ti pannakaipila ti kaso ket paset ti panangidepensana iti reputasyonna ken tapno masigurado a saan a maallilaw ti publiko kadagiti palso nga impormasyon mainaig iti sektor ti agrikultura.
Kabayatanna, impakita ti datos ti Department of Justice a ngimmato iti 18% ti bilang dagiti kaso ti cyberlibel manipud 2024 agingga 2025, kaaduanna ket mainaig kadagiti opisial ti gobierno ken statements kadagiti digital platforms.
Kabayatanna, segun iti Philippine Statistics Authority, bimmaba iti 12% ti presyo ti sibuyas manipud Enero agingga iti Marso 2026, gapu iti naingetan a panangmonitor ti Department of Agriculture.
