Nababalaw online ti maysa nga AI-generated image ni US President Donald Trump nu sadino ket nakasuot isuna ti kawes ti Santo Papa, sumagmamano nga aldaw sakbay ti papal conclave idiay Vatican kalpasan ti panagpusay ni Pope Francis iti tawen nga 88.
Makita iti ladwan ni Trump a seryoso ti rupa na, nakatugaw iti Holy See, nakasuot ti puraw a vestments ken mitra, bayat a nakangato i maysa a ramay na. Naipost daitoy iti Truth Social, ken dagos nga in-repost ti opisyal ti White House account iti X account na wenno sigud a Twitter.
Segun met iti obispo ti New York karaman dagiti sumagmamano a konserbatibo a grupo a kumontra kenni Trump, daitoy ket panangrubo ken insulto iti pammati ti Simbaan Katolika bayat a nagkedked metten nga agkomento ti Vatican seknan ti isyu.
Sakbayna ket immunan a nag-angaw ni Trump a kayat na nga agbalin a Santo Papa ken dinakamat na ni Cardinal Timothy Dolan kas maysa a nalaing a kandidato, uray pay awan met isuna iti listaan dagiti papabili.
Mainaig iti dayta ket awan pay pulos ti nagbalin a Papa a nagtaud idiay Estados Unidos.
Idi bulan ti Pebrero, nag-post pay ni Trump ti AI-generated image nu sadino ket adda suot na a korona, kasaruno ti waragawag a nalpasen ti congestion pricing idiay New York.
Para kadagiti sumagmamano a tagasuporta, ang-angaw laeng daitoy ni Trump ngem para kadagiti adu a Katoliko, daitoy ket panagbastos iti naisantuan a proseso ti panagpili ti sumaruno a Santo Papa.
