Dimmanon ti kaunaan a gundaway ti naisayangkat nga air patrol dagiti puersa ti Pilipinas, Estados Unidos, ken Japan sadiay Bashi Channel, maysa nga estratehiko a dalan a manggudgudwa ti Mavulis Island idiay Batanes ken Taiwan.
Paset ti maika-15 a multilateral maritime cooperative activity (MMCA) daitoy nga aktibidad nga isaysayangkat ti Armed Forces of the Philippines (AFP), US Indo-Pacific Command, ken Japan Maritime Self-Defense Force.
Naiyuswat ti maritime activity sadiay West Philippine Sea manipud Pebrero 20 agingga 26.
Impatulod ti puersa ti Pilipinas dagiti nagduduma nga naval ken air assets pakairamanan ti BRP Antonio Luna manipud Philippine Navy, FA-50 fighter jets ti Philippine Air Force, C-208B, A-29 Super Tucano, ken Sokol Search and Rescue helicopter; indeploy met ti Philippine Coast Guard (PCG) iti BRP Gabriela Silang.
Kabayatanna, inusar met ti Estados Unidos ti USS Dewey ken P-8A Poseidon maritime patrol aircraft bayat a ti pagilian a Japan ket impatulod ti P-3 Orion maritime patrol aircraft.
Iti sabali a bangir, nasaripatpatan dagiti warships ti Chinese Navy kadagiti adu a gundaway ita a lawas asideg ti naval assets ti Pilipinas ken Amerika nga agpatpatrolya idiay WPS it kangitingitan ti maritime cooperative activity.
Karaman kadagiti nasaripatpatan asideg ti barko ti Pilipinas ken Estados Unidos ket ti presensiya ti Jiangkai II-class missile frigate Liuzhou 573 idi aldaw ti Lunes, Pebrero 23 ken ti guided-missile destroyer Hefei 174 iti amianan a paset ti Batanes ken asideg ti Bajo de Masinloc.
Segun kenni BRP Antonio Luna commanding officer Capt. Jennifer Monforte, ilegal ti presensya ti Chinese Navy iti uneg ti exclusive economic zone ti Pilipinas ken innayon a saan nga normal ti presensya da idiay Batanes.
