Imbutaktak ni sigud a DPWH Bulacan District Engineer Henry Alcantara iti Sandiganbayan Third Division a nakaawat isuna ti 2% cut kas “gentle request” manipud kadagiti maipagarop a kickbacks para kenni sigud nga Ako Bicol Rep. Zaldy Co.
Kinuna met ni Alcantara a daitoy ket inawagan na pay kas “lambing”.
Iti sinapataan a testimonya ti sigud a DPWH official, insalaysay na nga isuna ket nangipasa ti listaan ti proyekto kenni Co kasukat iti maipagarop a panagawat na kadagiti kickbacks.
Segun pay kenni Alcantara, dagiti maipagarop a kickbacks ni Co ket mapattapatta a 20% ngem daitoy ket dagus a nanayunan ken nagbalin a 25% idi panawen ti liderato ni sigud nga house speaker Romualdez.
Kinuna na pay nga awan iti impaay a rason ni Co nu apay a nanayunan iti kickback.
Iti naisayangkat a cross examination ti abogado ni Romualdez a ni Atty. Thea Daep, dinamag na ni Alcantara nu kiniddaw na iti 2% cut manipud kenni Co, sinungbatan na met daitoy nga isuna ket “naglambing” wenno nagwaragawag ti gentle request a 2% kickbacks.
Maipagarop a dagus a immanamong ni Co iti kiddaw ti opisial, innayon na pay a daitoy ket manipud iti advance payment dagiti contractors.
Maipalagip a sumangsango iti president’s cousin a ni Romualdez iti kaso a plunder wenno pandarambong mainaig iti maipagarop a 7.44 billion kickbacks daitoy kadagiti government infrastructure projects tawen 2022-2025.
