Ngimmato iti maika-42 a puesto ni Filipina tennis star Alex Eala iti kabaruan a rankings ti Women’s Tennis Association manipud iti sigud a No. 44, kalpasan ti kampaniana iti Madrid Open.
Nakastrek ni Eala iti second round ti torneo ken nagnayon ti 35 a puntos para iti pakabuklan a 1,285 points.
Inabakna ni Anastasia Pavlyuchenkova iti first round sakbay a naabak kenni Elise Mertens iti second round.
Iti doubles, kaduana ni Zeynep Sonmez ken dimmanonda iti maikadua a round. Inabakda ni Chan Hao-ching ken Fanny Stollar sakbay a naabak kada Katerina Siniakova ken Taylor Townsend.
Kas resulta, nakaala ni Eala ti 120 points iti doubles a nangingato kenkuana iti career-high a No.88 manipud iti sigud a No.99.
Iti agdama, adda isuna idiay Rome tapno pagsaganaan iti panagsabakna iti Italian Open.###
