Kalpasan ti historiko a kampania idiay Berlin, maipasango ni Alex Eala iti sabali pay a karit idiay Germany bayat ti panakiparis na kenni tennis legend Venus Williams iti WTA 500 Bad Homburg Open.
Agkadua iti doubles competition ti 20-anyos a Filipina tennis star Alex Eala ken iti pito a daras a kampeon iti Grand Slam a ni Williams. Iti umuna a round, maipasangoda iti qualifier pair kalpasan a nag-withdraw ti maysa kadagiti orihinal a kalabanda gapu ti injury.
Iti singles, sanguen ni Eala ni Belgian Elise Mertens, a nang-abak kenkuana iti Madrid Open ita a tawen.
Segun kenni Eala, dakkel a dayaw iti makaay-ayam ni Williams, nga ibilangna a maysa kadagiti kapatgan a personalidad iti women’s tennis. Kinunana a dakkel ti paset ni Williams iti pannakaparang-ay ken pannakabigbig ti women’s sports iti intero a lubong.
Agserbi ti Bad Homburg Open a maudi a panagsagana ni Eala sakbay ti Wimbledon Championships, a naituding nga agbalin nga umuna a Filipino seeded player iti prestihioso a torneo.
Nagtultuloy ti nasayaat a panagtaray ni Eala iti grass-court season kalpasan a nangiposte ti 9-2 a rekord ken nangabak iti sumagmamano a nangato ti ranggona a players. Gapu iti daytoy, ngimmato iti No. 30 iti live WTA rankings ken ad-adda a pinatibker ti puesto na kas maysa kadagiti rumangrang-ay a bituen ti women’s tennis.###
