LA UNION – Inimbitaran ti Quad Committee iti sumaruno a panagdengngeg inton Huwebes da Alice Guo, Cassandra Li Ong ken Atty. Harry Roque, ket maisentro iti operasyon ti illegal pogo hubs ti maika-innem panagdengngeg ti Quad Committee.
Segun kenni Surigao del Norte Representative Robert Ace Barbers, mangidadaulo ti Quad Comm, imbitaran ti komite da Alice Guo, Cassandra Li Ong ken sigud a Presidential Spokesman Harry Roque.
Kinuna ni Barbers, nagsurat ti Quad Comm iti RTC Branch 282 Valenzuela City nga akin-hurisdiksiyon iti kaso ni Guo wenno Guo Hua Ping tapno palubosan a dumar-ay iti hearing inton Huwebes.
Ni Ong ket adda iti custodiya ti Kamara ken agdama a naka-detain iti detention facility ti Kamara.
Kabayatanna, agtultuloy a sap-sapolen dagiti otoridad ni Roque kalpasan nga immandar ti Quad Comm nga arestaren daytoy gaputi pannakapaay na a makapag-sumite ti required documents tapno paneknekan nga awan pakainaiganna iti operasyon dagiti illegal pogo hubs.
Ni-request pay ti Quad Comm iti Bureau of Immigration a mangiruar ti hold departure order kontra kenni Roque agsipudta maibilangen daytoy a fugitive wenno sap-sapolen ti linteg.
Kabayatanna, inlawlawag ni Barbers, agtalinaed ti imbitasyon da kenni sigud a President Rodrigo Duterte a sumango iti Quad Comm hearing gaputi pannakairamanna, saan laeng nga iti pogo ngem kadagiti pay extra judicial killings.
