Indepensa ti Kamara ti pannakayakar ti sumagmamano a pondo iti naisingasing a 2027 national budget gapu iti nabannayat a panaggasto ti sumagmamano nga ahensia.
Segun kenni Bataan 2nd District Rep. Albert Garcia, senior vice chair ti House Committee on Appropriations, nailasin kadagiti hearing dagiti programa a nabuntog a maipatungpal ken addaan pay ti nabati a pondo. Dadduma kadagitoy ti naiyakar kadagiti prioridad a programa tapno maliklikan ti saan a pannakausar ti kuarta ti publiko.
Impaganetget ni Garcia a dagiti laeng napili a programa ti maapektaran, saan a ti pakabuklan a badyet dagiti ahensia.
Innayonn pay nga awan ti pork barrel insertions iti naipasa a 2027 national budget.
Kabayatanna, Kinuna ni FPJ Panday Bayanihan Party-list Rep. Brian Poe a dimmanon iti P15.33 billion ti saan a nausar a pondo ti Disaster Rehabilitation and Reconstruction Assistance Program iti sidong ti National Disaster Risk Reduction and Management Fund, maibasar iti rekord idi Hunio 30, 2026.
Daytoy ti nagbalin a nakaibasaran ti singasing a manayunan ti quick response funds ti Department of Social Welfare and Development ken ti Department of Agriculture tapno mapapartak ti pannakaipaay ti tulong kadagiti naapektaran iti didigra.
Inallukoy ni Poe ti Senado ken civil society organizations a sukimaten dagiti programa nga addaan ti nababa gastos kas posible a pagalaan ti pondo nu adda dagus a pagkasapulan.
Nangited ti palawag dagiti mammanday-linteg iti baet dagiti saludsod mainaig iti P190 billion nga amyendar ti Kamara iti naisingasing a badyet.
