LA UNION – Maibilang a maysa a naidumduma a kapadasan para iti maysa nga ama ti suldado iti Philippine Marine dagiti kanito a makigubgubat ti anakda kadagiti terorista idiay syudad ti Marawi.
Iti pannakiuman ti Bombo Radyo La Union kenni Leonard Velasco, ama ni PFC Kleft Ariz Velasco a nakilaban iti Maute Terror Group idiay Marawi, kinunana nga iti uneg ti lima a bulan ket saan daytoy a makaturog ti nasimbeng gapu iti nakaro a panagdanag iti anakda a makirangranget iti nasao a syudad.
Kanayon daytoy nga agpadpadaan iti cellphone tapno makasarita ken maammuan ti kasasaad daytoy.
Adda met kinunana dagiti gundaway nga agsarsaritada kenni Kleft kabayatan nga adda iti kangitingitan ti gubat dagiti suldado sadiay.
Iti salaysay pay ni Mister Velasco, saan a narambakan ti anakda ti kasangay daytoy idiay marawi gapu ti tensyon, ngem naaddaan laeng iti bassit a panagsagana iti pamilyada idiay Barangay Cabalayangan, ili ti Bauang, La Union.
Agyamyaman met daytoy gapu ta naggibusen iti gubay sadiay ken naglippas metten iti panagdanagda.
Iti panagbakasyon ni PFC Velasco ditoy La Union,ket aggigiddan daytoy a makimisa iti umuna nga aramidenda kas panagyaman gapu ta nakaawid a natalged daytoy a naggapu manipud iti napeggad a misyon.
