Impetteng ni Senador Ronald “Bato” dela Rosa a panawenen tapno mabaliwan ti 11 a tawen a Comprehensive Firearms and Ammunition Regulation Act.
Iti sponsorship speech ni Dela Rosa, impaganetgetna a ti singasing ket mangitantandudo iti responsable a panagtagikua iti paltog ken panangsigurado nga addaan ti gobierno iti umdas a regulatory power iti panagaramid ken panaglako kadagiti paltog ken bala.
Manamnama a ti panag-amyendar ti linteg ket mangipaay dalan tapno naan-anay pay nga agbalin a patas ken inclusive ti gun ownership ditoy pagilian.
Karaman iti pannakabalbaliw ti pannakaited ti hepe ti PNP iti bileg a mangdutok iti pannakabagi a mangipaulog iti Permit to Carry Firearms Outside Residence (PTCFOR), pannakainayon dagiti propesional nga exempted iti requirement nga addaan iti threat assessment certificate, ken aramidenen sangpulo a tawen ti validity ti license to manufacture and deal firearms.
Inlawlawag ni Dela Rosa a saan a panangpalag-an daytoy kadagiti restriksion no di ket tapno maitandudo ti kultura ti kinatalged ken responsibilidad babaen ti pananglawlawag kadagiti pagannurotan ken panangitandudo iti responsable a panagtagikua iti paltog.
