Pinasingkedan ti Iranian media a napapatay iti anak a babae, manugang, ken apo ni Supreme Leader Ayatollah Ali Khamenei kadagiti airstrike nga insayangkat ti Estados Unidos ken Israel iti compound-na idiay Tehran.
Maibasar iti report ti Fars News Agency ken dadduma pay a lokal a media idiay Iran, napapatay iti airstrikes dagiti miembro ti pamilia ti nasao a lider.
Napasingkedan ti pannakatayda kalpasan nga impalgak daytoy ti maysa a reliable source nga adda iti uneg mismo ti pagtaengan ti Supreme Leader.
Insayangkat ti Estados Unidos ken Israel iti joint combat operations idiay Iran tapno parmeken iti rehimen ni Ayatollah.
Iti agdama, awan pay ti nairuar nga opisial a waragawag manipud iti kampo ni Khamenei maipapan iti pudno a kasasaadna, nupay immunan nga inwaragawag ni Israel Prime Minister Netanyahu nga adda dagiti pagilasinan nga uray ti Supreme Leader ket napapatay met iti nadakamat a panangraut.
Impaganetget met dagiti sumagmamano nga opisial ti Islamic Revolutionary Guard Corps (IRGC) a sibibiag pay ni Ayatollah Khamenei ken ti waragawag a natay isunan ket paset laeng ti “psychological warfare” ti Israel ken ti Estados Unidos.###
