Imbutaktak ni House Deputy Speaker ken Antipolo 1st District Representative Ronaldo Puno nga adda dagiti nakita na nga issue wenno ‘anomalya’ iti 2026 national budget kangrunaan kadagiti flood control projects, no sadino adda dagiti nakailanad a proyekto ngem nalpasen bayat a dagiti priority flood control projects ket nagpukaw.
Agsubsubmitir dagiti District Engineers ken Regional Officers ti Department of Public Works and Highways ti listaan ti proyekto para iti congressional districts nga addaan ti agarop 150 million pesos a pondo para kadagiti lokal a proyekto.
Idi nakaala iti kongresista ti kopya ti naisubmitir a listaan manipud District ken Regional Office ti DPWH, saan a nakalanad dagiti proyekto ken nasukatan.
Saan laeng nga iti distrito ni Puno iti nakapasar ti iregularidad, no di ket karaman pay ni House Majority Leader ken Ilocos Norte Representative Sandro Marcos a mismo nga anak ti Presidente.
Imbutaktak met ti House Deputy Speaker a napondoan manen dagiti nalpasen a proyekto iti distrito ni Marikina City Representative Marcelino Teodoro.
Malidayan isuna gapo ta mapagbidbiddutan nga adda ti ar-aramiden a kalokwan iti maysa a kongresista no nagsubmitir ti ‘errata’.
Gapo kadagiti nadiskubre nga anomalya, kaykayat langnen ni Puno a maaddaan ti reenacted budget kaysa awaten iti 2026 National Expenditure Program – a rason metten ti panangipila ti House resolution nga addaan panggep nga imbestigaran dagiti “funders” ti infrastructure projects kas kadagiti flood control projects.#
