LA UNION – Kagiddan iti panaglukat ti klase ita nga aldaw kadagiti pampubliko a pagadalan ita nga SY 2018-2019, papigsaen met ti La Union Police Provincial Office (LUPPO) iti kampanya daytoy nga anti-bullying kadagiti amin a pagadalan iti intero a probinsiya.
Kinapudno na, nangimuntar ti pulisiya iti police assistance a mabalin a pagturongan wenno dumatagan dagiti maseknan nga estudyante, tapno i-reklamo dagiti mangbul-bully kadakuada iti pagadalan.
Daytoy ti impaganetget iti Bombo Radyo La Union ni Chief/Inspector Silverio Ordinado, agdama a police relation officer iti LUPPO.
Kabinnulig ita dagiti pagadalan iti PNP iti pananglaban ti bullying kadagiti estudyante tapno masalakniban dagitoy manipud kadagiti pangas ken nakarit nga agtutubo, a rumbeng a madisiplina-an.
Inallokoy pay ni Ordinado dagiti mabul-bully nga estudyante a saan nga agbuteng nga umasideg kadakuada a pulis, tapno i-reklamo dagiti nalalastog nga estudyante.
