LA UNION – Nangisayangkat ti joint maritime drills iti Armed ken Defense forces ti Pilipinas, Amerika, Australia, Japan ken New Zealand iti exclusive economic zone ti Pilipinas ita nga aldaw ti Sabado, Setyembre 28.
Kinumpirma daytoy ni AFP chief Gen. Romeo Brawner Jr. iti maysa nga statement.
Kinuna na a ti nagtitipon a pwersa dagiti nasao a pagilian ket mangipak-pakita ti kolektibo a commitment tapno papigsaen pay ti regional ken international cooperation kas suporta iti nawaya ken silulukat nga Indo-Pacific.
Kinuna pay ti AFP chief a nag-operate iti nagtipon a naval ken air force units dagiti nakipaset a pagilian para iti panangpasayaat pay ti kooperasyon ken interoperability iti baetan dagiti puwersa armada.
Kinuna a naisayangkat ti aktibidad maiyannurot iti international law ken panangitandudo ti natalged a panaglayag, karbengan ken interes ti dadduma nga estado.
Segun pay iti AFP, ti nasao a joint sail ket mangipak-pakita ti commitment dagiti nasao a pagilian iti panangitandudo ti nawaya a panaglayag ken panag-patayab iti lugan pang-tangatang, lehitimo a panangusar iti kabaybayan ken international space kasta metten a panang-respeto iti maritime rights iti sidong ti UN Convention on the Law of the Sea.
Saan metten a dinakamat ti AFP chief dagiti nakipaset nga assets ti pagilian, ngem segun iti Australian Defense Mionistry, karaman iti panagsanay iti His Majesty’s Australian Ship (HMAS) Sydney ken Royal Australian Air Force P-8A Poseidon maritime patrol aircraft.
Ti nasao a panagsanay ket maika-uppat a Multilateral Maritime Cooperative Activity ita a tawen.
Ti immuna a panagsanay ket naisayangkat idi Abril iti EEZ ti Pilipinas kadwa na iti US, Japan ken Australia.
Simmaruno idi Hunyo ken Agosto.
