LA UNION – Arestado iti maysa a 32-anyos a babai iti insayangkat dagiti otoridad a buy bust operation idi rabii idiay Biday, San Fernando City, La Union.
Ti suspek ket managan Eden Parado, residente ti nasao a lugar.
Maibasar iti report, nagresulta ti operasyon iti pannaka-kumpiskar iti dua a sachet ti maatap a shabu, maysa a pidaso ti 1000 peso bill a buy bust money, agraman ti motorsiklo nga inusar ti suspek iti nadakamat nga illegal transaction.
Kabayatanna, pinaglibakan ti suspek a kukua na dagiti nakumpiskar a droga ngem inaklon na a karaman iti panaglakwan ti maiparparit nga agas.
Naamwan nga uray ti asawa ni Parado ket sigud a nakemmeg ken naibalud kalpasan a maarestar iti buy bust operation idi Marso 29, 2017 iti Barangay Parian ditoy syudad.
Iti agdama, maisag-sagana ti kaso a panaglabsing iti Sections 5, 11 ken 12 iti R.A. 9165 wenno Comprehensive Dangerous Drugs Act of 2002.
