Naan-anayen a nakaruar iti Philippine Area of Responsibility ti Severe Tropical Storm Kristine ita nga aldaw ti Sabado ken adda itan iti kaadayo a 535km Laud ti Bacnotan, La Union.
Nupay kasta, agtultuloy latta a mangigubuay ti nalulem a tangatang ken mawaras-waras a panagtudo ken panagggurruod ti Trough wenno tartara-ipos ti Bagyo idiay Occidental Mindoro ken Palawan.
Kasta metlaeng a paniempo ti igubuay ti Southwesterly Windflow idiay Visayas, Zamboanga Peninsula, Northern Mindanao, ken CARAGA bayat nga Localized Thunderstorms met idiay Metro Manila ken nabatbati pay a paset ti pagilian.
Kabayatanna, nabukelen a bagyo ti Low Pressure Area a nasaripatpatan ti PAGASA iti ruar ti PAR. Addaan daitoy iti international name nga “Kong-Rey,” ken maawagan a Bagyong Leon apaman makastrek ditoy Pilipinas.
Napaliiw daitoy iti kaadayo a 1,825km Daya ti Central Luzon, kabuyog ti 65km/hr a kapigsa ti angin ken kapegges a dumanon iti 80km/hr.
Dupdupagen na ti agpa Amianan-a-laud a direksyon ti kapartak a 35km/hr.
Posible latta iti layos ken landslides ditoy pagilian nu agtultuloy ti panagtudtudo.
