Pinabasol ni Senadora Imee Marcos iti kinunana a kinakurang ti naan-anay a pakdaar manipud ti Philippine Atmospheric, Geophysical and Astronomical Services Administration wenno PAGASA nga isu’t makagapo kadagiti adu nga pimmusay idi nagduprak ti Bagyong Kristine.
Kinuna ni Senadora Marcos nga awan ti umdas a ballaag manipud iti state weather bureau mainaig iti possible nga epekto ti Bagyong Kristine a nakatayan ti saan a bumaba ti 146 nga indibidwal, nakadunoran ti 91 a dadduma pay ken 19 iti naipadamag nga agingga ita ket agtaltalinaed a mapukpukaw.
Impaganetget ti senadora, nu nabagaan a nasayaat ti PAGASA dagiti local government units mainaig iti agbalin nga epekto ti bagyo ket nasapsapa kuma a naevacuate ti ad-adu nga indibidwal ken amangan basbassit kuma dagiti pimmusay.
Dinamag na pay nu apay nga tunggal adda bagyo ket agkurkurang latta ti abiso idinto nga addaan met ti umdas nga pondo ti gobierno.
Nu idasig kunana iti 2024 General Appropriations Act iti 2025 National Expenditure Program, ngimmato pay ti budget ti Department of Science and Technology iti P1.542-B kasta met a ngimmato iti budget ti PAGASA iti P290-M manipud iti P1.641-B ket nagbalinen a P1.931-B para inton 2025.
