LA UNION – Nabigbigen iti nasarakan a bangkay ti lalaki iti igid ti kalsada idiay Barangay Lioac Norte, Naguillian, La Union idi agsapat kalman.
Maibasar iti nakalap nga impormasyon ti Bombo Radyo La Union, iti nasao a bangkay ket nabigbig iti nagan a Robert Lagasca, 33, maysa a mannalon, ken residente ti Gusing Norte ti nasao met laeng nga ili.
Maipalagip a maysa pay a motorsiklo iti nakita dagiti otoridad iti nakaidasayan ti bangkay ti biktima.
Base iti registration certificate a naala iti nasao met laeng a motorsiklo, kukua daytoy iti managan Edward Soriano ti Barangay Acao, Bauang, La Union.
Immunan nga imbaga ni C/Ins. Melanie Ordono ti Scene of Crime Operatives (SOCO) ti Police Regional Office-1, a nalaslas iti tengnged ti lalaki a puon ti maipagarop a nakatayan daytoy.
Kabayatanna, agtultuloy iti imbestigasyon dagiti otoridad iti nasao nga insidente tapno amwen iti kinasiasino ti suspek a nangaramid iti krimen.
