Maysa a bangkay ti lalaki a mapapati a nagbekkel iti maysa a puon ti kayo, iti nasarakan iti kabakiran a paset idiay Barangay Sapilang, Bacnotan, La Union idi Sabado, Enero 21.
Saan pay a nabigbig iti biktima, ngem inladawan dagiti pulis a nakasuot ti red t-shirt, malaksid pay iti maysa a top sider shoes a nakita iti nasao a lugar.
Kas makita iti ladawan, iti bangkay ket kimbet ken nangisit metten daytoy, ket mapapati a sumagmamanon a lawas ti napalabas sakbay ti insidente.
Base iti initial report ti Bacnotan Police Station, nagusar ti nylon rope iti saan a nabigbig a lalaki iti maipagarop a panagbekkel daytoy.
Iti bangkay ket nakita iti dua a lallaki nga isuda Roger Arellano, 50-anyos, maysa a mannalon, residente ti Barangay Sapilang ken Rogelio Barnachea, agtawen ti 29, residente ti Barangay Casiaman.
Dagiti dua ket mapan da koma kitaen iti water reservoir wenno pagtataudan ti danum, idi makita da iti bangkay.
Dagus da nga impakaammo daytoy iti managan Napoleon Valeriano Cayabyab, agtawen ti 47, residente iti Brgy. Poblacion ti nasao nga ili, nga isu met ti nag-report kadagiti otoridad.
Agtultuloy iti imbestigasyon dagiti otoridad tapno duktalen iti kinasiasino ti lalaki a nagbekkel iti nasao a lugar.
