LA UNION – Pimmusay bayat a matamtaming iti Lorma Medical Center ti maysa a 16-anyos a barito kalpasan a nalmes iti baybay itay agsapa.
Nabigbig ti pimmusay a ni Aivan Rench Catbagan, residente ti Barangay Naguituban idiay ili ti San Juan.
Maibasar iti imbestigasion ti San Juan Police Station, naggiinnawis nga agdigos iti baybay idiay Barangay Urbiztondo da Catbagan ken dagiti kasinsinna itay alas-6:45 ti agsapa.
Nupay kasta, bayat ti kaaddada iti tengnga ti baybay ket sinaplit ida ti napigsa a dalluyon a nakalmesan ti barito.
Dagus met daytoy a naitaray iti kaastitgan nga ospital ngem saanen a naispal pay dagiti doktor ti biagna.
