BR LA UNION – Umaboten iti walo ti naipadamag a natay gaputi epekto ti Habagat ken iti naglabas a bagyo Luis ken Maymay, maibasar iti kauddian a datos ti National Disaster Risk Reduction and Management Council (NDRRMC).
As of 6:00 PM, Agosto 9, 2026, dua a tattao ti natay idiay Rizal gaputi rockslide; dua idiay Batangas gaputi pannakalmes ken electrocution; dua idiay Benguet gaputi landslide; ken dua ditoy La Union gaputi landslide, electrocution, ken pannakalmes.
Maysa met ti mapukpukaw idiay Batangas ken pito ti nasugatan idiay Benguet gaputi landslide ken aksidente iti lugan.
Kabayatanna, agtultuloy ti panaglayos iti sumagmamano a paset ti Ilocos Region, Central Luzon, MIMAROPA, Cordillera Administrative Region, ken CALABARZON gapu ti awan sarday a napigsa a panagtudo .
Idiay Marikina,dimmanon iti 2nd alarm ti Marikina River sakbay nga ag-alas-11 ti agsapa, rason tapno umakar dagiti residente nga agnanaed asideg iti karayan.
Nasurok 400 a tattao ti immakar iti evacuation center idiay Concepcion Integrated School.
Segun kenni Marikina 1st District Representative Marcy Teodoro, saan a nagkurri iti Tumana Pumping Station, isunga saan a dagus a nairuar ti layos agturong idiay Pasig River.
Kabayatanna, idiay La Trinidad, Benguet, naan-anay a narsuod ken naiyanod ti maysa a paset ti Beckel Road gaputi soil erosion gapwanan ti napigsa a panagtudo.
Iti pakabuklan, imbaga ti NDRRMC a nasurok 124,000 a pamilya ti naapektaran ti dakes a panawen iti intero a pagilian.
Nasurok kumurang a 2,500 a pamilya ti agtaltalinaed iti evacuation center, bayat a 170 a babbalay ti nadadael ken 13 iti naan-anay a nadadael.
