BR LA UNION – Tallo iti nailista a natay agraman ti maysa nga ubing, uppat iti naisalbar bayat a lima dagiti mapukpukaw iti napasamak a landslide idi rabii, Agosto 9, idiay Barangay Guisad Surong, Baguio City, Benguet.
Segun iti Baguio City Public Information Office (BCPIO), tallo a babbalay iti nagaburan ti landslide a naka-apektaran ti lima a pamilya.
Ti umuna a balay ket addaan ti pito nga agnanaed; ti maikadwa a balay ket dua ti agnanaed; bayat a ti maikatlo ket tallo ti occupants.
Segun kenni Baguio City Mayor Benjamin Magalong, agtultuloy iti search and rescue operations kalpasan ti landslide, a napasamak agarop alas 7:00 idi rabii bayat ti kangitingitan ti nakaru a panagtudo kas epekto ti habagat.
Maibasar iti report ti Baguio City-PIO, 14 a pamilya a buklen ti nasurok 60 nga indibiduwal, a pakairamanan dagiti ubbing nga agtawen ti tallo agingga pito, ti dagus a nagbakwit manipud Guisad Surong ken agdama a nakadagus idiay Baguio International Academy, malaksid pay iti pito nga evacuees nga agtatalinaed idiay Guisad Surong Barangay Hall.
