BR LA UNION – Aganay 8.4 milyon nga indibidwal iti naapektaranen ti panagduprak ti habagat ken dagiti napalabas a bagyo Luis, Maymay ken Neneng.
Segun iti National Disaster Risk Reduction and Management Council (NDRRMC) a kaibatugan daytoy iti 2.4 a pamilya manipud Zamboanga Peninsula, Central Luzon, National Capital Region, Ilocos Region, Cagayan Valley, Calabarzon, Mimaropa, Cordillera Administrative Region ken Bicol Region.
Umabot met iti 122,500 a tattao ti agtaltalinaed kadagiti evacuation centers.
Nakailista ti NDRRMC iti 32 a tattao a natay gapu ti dakes a panawen ken kaadwan kadagitoy ket manipud Benguet gaputi landslides.
Nakailista pay ti casualty iti probinsiya ti La Union, Rizal, Batangas, Quezon, Mindoro, Negros Occidental, ken Caloocan gaputi insidente ti, electrocution, rockslide, ken pannaka-buwal dagiti kayo.
Umaboten iti P6.11 bilyon ti nailista a nadadael kadagiti imprastraktura bayat a P2.32 bilyon ti pukaw iti sektor ti agrikultura.
Sumagmamano a lugar ti nagdeklara ti state of calamity a pakaibilangan idiay Benguet, Bataan, Bulacan, Pampanga, Zambales, Rizal, Cavite, Batangas, Occidental Mindoro ken naudi iti probinsiya ti Tarlac.
Kabayatanna, umaboten ti ti 3,000 a babbalay ti naideklara a nadadael a pakairamanan iti 349 a totally damaged.
Siniguro ti gobyerno nga agtultuloy ti panagipatulod ti tulong ken umaboten iti P1.65 bilyon a balor ti relief assistance ti naibunong kadagiti apektado nga umili.
