Kinuna ni Agriculture Secretary Francisco P. Tiu Laurel Jr. a pabor daytoy iti singasing a maideklara ti State of Calamity tapno alisto a mausar ti pondo ken tulong ti gobierno kontra iti kumarkaro nga epekto ti El Niño.
Inted ni Tiu Laurel ti suportana iti singasing ni Sen. Francis Pangilinan gapu iti pakdaar ti PAGASA a mabalin nga agbalin a nakaro a “Super El Niño” ti pudot a mapasaran ditoy pagilian.
Segun iti sekretario, kasapulan nga agtignay a dagus ti gobierno ken saanen nga urayen a kumaro ti pannakadadael iti agrikultura tapno masalakniban ti panagbiag dagiti mannalon ken ti suplay ti taraon.
Impaganetget met ni Pangilinan a dakkel ti maitulong ti kastoy a deklarasion tapno alisto a mairuar dagiti kasapulan a pondo ken maipatungpal dagiti addang kadagiti apektado a rehion.
Nagballaag met ti Department of Agriculture a mabalin a maapektaran ti umabot iti 4.6 million a mannalon ken mangngalap, kasta met ti posible a pannakakissay ti produksion ti pagay no agtultuloy ti nakaro a tikag.
Suplay ti ikan ditoy pagilian, agtaltalinaed nga umdas iti tengga ti Epekto ti El Niño; Importasyon iti Sektor ti panagkalap, Dinepensaran ti BFAR
Impasigurado ti Bureau of Fisheries and Aquatic Resources (BFAR) nga umdas ti suplay ti ikan iti pagilian iti laksid ti nakaro nga El Niño a manamnama nga agpaut agingga iti umuna a kuarter ti tawen 2027, segun kenni BFAR Spokesperson Nazario Briguera iti eksklusibo nga interview ti Bombo Radyo.
Nupay umdasen ti suplay iti agdama, impakdaar ni Briguera a ti nakaro a pudot ket mabalin a mangapektar iti marine environment ken distribusyon dagiti sida.
Tapno malapdan ti fish kill, impalagip ti BFAR kadagiti operators ti pupukan ken fish cages a suroten dagiti good aquaculture practices ken umno nga stocking density.
Nangipaay met ti Department of Agriculture iti pondo para kadagiti solar-powered aeration system kadagiti kangrunaan a lugar ti produksion tapno mataginayon ti umdas a dissolved oxygen iti danum.
Agtultuloy met ti operasyon dagiti technology outreach stations tapno masigurado ti suplay ti semilia para kadagiti fish farmers nga agdama a bumangbangon manipud iti pannakadadael.
Kabayatanna, inlawlawag ni Briguera a ti panagangkat iti ikan ket nakaibasar iti panagadal ken rekomendasion ti National Fisheries and Aquatic Resources Management Council. Temporario daytoy a maararamid tunggal closed fishing season wennu wenno bayat ti panawen ti didigra tapno mataginayon ti suplay ken malapdan ti panagngato ti presio.
Impaganetget pay ni Briguera a kasapulan a maipangruna ti fuel assistance tapno maksayan ti gastos iti produksion dagiti mangngalap ken makatulong a mangkontrol iti implasion iti sektor.
