BR LA UNION – Agtultuloy ti isay-sayangkat nga imbestigasyon dagiti kameng ti Tuba Police Station seknan iti nasarakan a bangkay iti uneg ti maysa a puraw a kotse, a nakaparada iti kalsada idiay Kennon Road, iti nagbaetan ti Barangay Camp 3 ken Barangay Twinpeaks, Tuba, Benguet.
Maibasar iti kauddian a report dagiti otoridad, ti bangkay ket maysa a 56-anyos a lalaki, maysa a bank manager, ken residente ti Aurora Hill, Baguio City.
Iti panagresponde ti Scene of the Crime Operatives (SOCO) ken barangay health workers, nadiskubre da a ti biktima ket nakatugaw iti front passenger seat, naka-seatbelt ken nagsagaba ti maysa a tama ti bala ti paltog iti ulo na.
Narekobre pay ti maysa a calibre 22 revolver iti crime scene ken awanan ti serial number.
Naamwan a maysa a sibilyan ti nagreport iti barangay, sakbay a naipaka-ammo kadagiti otoridad.
Naiturong ti bangkay ti biktima iti maysa a punerarya idiay siyudad ti Baguio.
Kabayatanna, segun iti asawa ti biktima, pimmanaw daytoy manipud iti pagtaengan da agarop alas 7:00 ti rabii idi Setyembre 28, 2026 ken nagpakada nga agturong idiay Manila tapno umawat ti award, ngem maysa metten a bangkay idi masarakan kabigatanna, Setyembre 29.
Agtultuloy ti panangduktal dagiti otoridad iti motibo ti krimen ken nu adda ti sabali a tao a nangaramid ti pammaltog.
