BR LA UNION – Umaboten iti aganay 800 a tattao iti kumpirmado a natay bayat a ribu pay laeng ti agtaltalinaed a mapukpukaw kalpasan ti nakaam-ames a panaglayos ken panagregga-ay ti daga iti nagbeddengan ti Nepal ken Tsina.
Nangrugi ti trahedya idi nagdayusdos ti maysa a dakkel a glacier manipud iti kabantayan idiay Himalayas idi Miyerkules a nangparnuay ti napigsa nga ayos ti danum, bato, yelo, ken pitak kadagiti karayan ti Trishuli ken Bhotekoshi.
Nasurok 3,000 a tattao ti pakabuklan a bilang dagiti mapukpukaw idiay Nepal ken iti rehiyon ti Tibet idiay China, a nakaiyanudan ti sumagmamano a bangkay a naisadsad agingga iti kabangibang a pagilian nga India.
Kabilang dagiti agtultuloy a masap-sapol iti nasurok 900 a mangmangged manipud iti 11 hydropower projects idiay Nepal a nagaburan ti napuskol a pitak ken bangkay .
Naiyuswat iti nalawa a rescue operation iti gobyerno ti Nepal usar ti nasurok-kumurang 19,000 security personnel ken 16 a helikopter tapno sapolen dagiti biktima iti laksid ti nakaru ken narungsot a panawen.
Nagpatulod metten ti tulong dagiti eksperto a bunggoy ti India ken Tsina, bayat a nangidanon metten ti minilyon a dolyar a humanitarian aid iti United Nations ken dadduma pay a pagilian.
Mapatta a P6.16 bilyon iti damyos iti inprastraktura ken agrikultura.
