BR LA UNION – Nagballaag ti PAGASA iti posible a nakaru a panagtudo iti sumagmamano a paset ti Luzon gapu iti agtultuloy nga epekto ti Southwest Monsoon wenno Habagat a makaapekto agingga Miyerkules, Agosto 12.
Iti Weather Advisory nga inruar ti ahensya itay alas-11 ti rabii ti Domingo, Agosto 9, imbaga ti PAGASA a mabalin a nalab-labes pay ngem 200 millimeters ti tudo idiay Benguet manipud ita a rabii agingga malem nu bigat, Lunes, Agosto 10.
Namnamaen met iti 100 agingga 200 millimeters a buyat ti tudo idiay Ilocos Sur, La Union, Zambales, Bataan, Metro Manila, Rizal, Cavite, ken Occidental Mindoro.
Kabayatanna, 50 agingga 100 millimeters a tudo iti mabalin a mapasaran idiay Ilocos Norte, Abra, Pangasinan, Kalinga, Mountain Province, Ifugao, Nueva Vizcaya, Tarlac, Nueva Ecija, Pampanga, Bulacan, Batangas, Laguna, ken Oriental Mindoro
Manipud malem ti Lunes agingga Martes (August 11), namnamaen ti 100 agingga 200 millimeters a buyat ti tudo ditoy La Union, Benguet, Zambales, Bataan, ken Occidental Mindoro bayat a 50-100 mm a tudo idiay Ilocos Sur, Abra, Pangasinan, Tarlac, Nueva Ecija, Pampanga, Bulacan, Metro Manila, Cavite, Batangas, ken Oriental Mindoro.
Manipud malem ti Martes agingga Miyerkules (August 12), 100 agingga 200 millimeters iti posible a buyat ti tudo idiay Zambales, Bataan, ken Occidental Mindoro, bayat a 50 agingga 100 millimeters ti namnamaen ditoy La Union, Ilocos Sur, Pangasinan, Benguet, Tarlac, Pampanga, Nueva Ecija, Cavite, ken Batangas.
Kabayatanna, nakuyem a tangatang a mabuyogan ti mawaras-waras a panagtudo ken thunderstorms ti namnamaen idiay Negros Island Region ken dadduma pay a paset ti Western Visayas ken Luzon.
Idiay Batanes, posible latta iti panagtudo ken thunderstorms gaputi trough wenno extensions ti Tropical Cyclone Dolphin.
Kabayatanna, maysa a tropical storm nga addaan ti international name a Peilu, sigud nga LPA 08c, iti banbantayan ti PAGASA iti ruar ti Philippine Area of Responsibility (PAR).
Naudi a nasaripatpatan ti bagyo iti kaadayu a 2,200 kilometro daya ti extreme Northern Luzon, kabuyog ti kapigsa ti angin nga umabot iti 65 kilometro kada oras ken kapegges agingga 85 kilometro kada oras bayat nga agtur-turong iti daya abagatan-a-daya iti kapartak a 25 km/h.
