Pimmusay ti maysa a baro kalpasan a mapapati a kimmaro ti sakit na a kissiw bayat nga adda ti tengnga ti taltalon idiay Barangay Sto Domingo Norte, Luna, La Union itay nabiit.
Nabigbig ti pimmusay a biktima a ni Mark Aldrin Nacionale, 31 anyos, baro, maysa a mannalon, residente ti nadakamat a barangay.
Maibasar iti imbestigasyon dagiti otoridad, agarop alas-5 ti malem ti kapada nga aldaw, bayat ti panagturong ti taltalon ni Aries Gil Bongao, agtawen 45 anyos, mannalon, residente ti Barangay Barangobong, Luna, La Union, nakita na ti bagi ti maysa a lalaki a nakasubsob iti kadanuman a paset ti taltalon.
Gapu ti daytoy, dagusna nga inpaka-ammo ti nakitana kadagiti Barangay Officials ken kimmiddaw da met ti tulong ti Luna Police Station.
Maibasar ti istorya ti ama ti biktima a ni Ernesto Nacionales, agtawen 58, imbatadna nga iti anak na ket agsagsagaba ti sakit a epeliptic disorder.
Innayon na pay a sakbay ti pasamak, immatake ti sakit daytoy ti alas-7 ti bigat ti kapada met laeng nga aldaw.Idi dimmanon iti oras ala-1:30 ti malem, iti anakna ket pimmanaw ti pagtaenganda a napan ti taltalon tapno mangala ti kankong nga ipakpakanna kadagiti dingwen a tarakenna.
Naideklara a pimmusay ti biktima babaen ti attending physician a ni Dr Primitivo Gil Zambrano gapu ti asphyxia ken epeliptic.
Innayonpay ti doctor ti posibilidad nga uppat agingga lima nga orasen ti napalabas a natay ti biktima sakbay daytoy a naduktalan.
Nagkedked metten ti pamilya ti biktima nga ipasidong daytoy ti otopsiya.
