BR LA UNION – Usaren ti Philippine Army (PA) dagiti baro nga arwaten panggubat iti sidong ti Salaknib Exercises 2026, kabilang iti Ascod tanks, self‑propelled 155mm artillery, ATMOS (Autonomous Truck Mounted Howitzer System), ken dadduma pay a kagawaan a nagatang iti sidong ti AFP Modernization Program.
Napadas metten dagiti baro nga Armored Escort Vehicles (AEV) iti nasao met laeng a simulation.
Segun kenni Army Spokesperson Col. Louie Dema‑Ala, mailinya dagiti baro nga arwaten ti puwersa kadagiti imet ti US Army Pacific, Japan Ground Self‑Defense Force, Australian Army, ken New Zealand Army, nga agpapada nga addaan impatulod a contingent iti Northern Luzon, a kangrunaan a venue ti military drill.
Iti agdama, saan pay a masigurado no mausar iti drill ti Typhon Missile System ti US, nga immunan a pinagduaduaan ti sumagmamano a pagilian a kas ti China gaputa maipagarop a pangta daytoy iti regional security iti Asia-Pacific.
Inlawlawag ni Col. Dema‐Ala, ti laeng liderato ti AFP ken US Armed Forces ti addaan iti bileg a mangdesisyon no iramanda nga usaren daytoy iti simulation.
Ti Salaknib 2026 ti addaan kadakkelan a bilang dagiti nakipaset manipud idi nangrugi ti nasao a panagsanay, nga addaan iti nasurok a 7,000 a soldado manipud iti lima a pagilian, agraman ti Pilipinas.
Gapu iti kasaknap a mobilisasyon, inabisuwan metten ti Phil. Army dagiti residente iti Northern ken Central Luzon seknan iti presensiya ti military trucks, aircraft, ken suldado manipud US, Japan ken dadduma pay a kabilang iti drill.
Nangrugi ti nasao a panagsanay idi Abril 6 ken agpatingga inton Abril 17, 2026.
