LA UNION – Imbaga ti baro nga Officer in Charge ti Balaoan Police Station nga aramiden iti amin tapno maresolba iti napasamak a pannakatambang iti ag-ama a Mayor ken Vice Mayor Concepcion idiay Balaoan, La Union.
Iti pannakiuman ti Bombo Radyo La Union kenni PSINSP VIRGILIO D. CRUZ, kinuna na nga aramiden na iti amin kadua iti nabukel nga Special Investigation Task Group tapno maresolba ti kaso iti kabiitan a panawen.
Kabayatan na, inallukoy ni Cruz Iti publiko nga agsarita wenno mangted iti salaysay maipapan iti napasamak a krimen.
Maipalagip a tinambangan dagiti saan pay nga ammo a suspek iti lugan ni Mayor Aleli ken ama na a ni Vice Mayor Al-Fred Concepcion iti sango a mismo ti Balaoan Central School kabayatan nga agturong dagitoy iti munisipiyo, a nakatayan ti bise mayor ken body guard na a ni Michael Ulep.
