BR LA UNION – Namnamaen manen ti baro a panagngato ti presyo dagiti produkto a petrolyo iti sumaruno a lawas, segun iti Department of Energy (DOE).
Daytoy ket iti tengnga ti saan nga agtalna a garaw ti presyo iti sangalubongan a merkado gaputi pananglapped ti Iran iti sumagmamano a paset ti Strait of Hormuz, a kritikal a pagnaan iti one-fifth a suplay ti langis iti intero a lubong.
Segun kenni Energy Secretary Sharon Garin, posible a ngumato manen ti presyo dagiti produkto a petrolyo iti sumaruno a lawas, ngem saan a masinunuo nu manu ti ngumatuanna, a gapwanan ti agtultuloy a riribok idiay Middle East.
Siniguro ti sekretaryo nga adda umdas a suplay ti pagilian agingga iti 50 aldaw, ngem ti problema ket iti presyo dagiti petroleum products.
Kinuna na a binilin ti gobyerno dagiti kompaniya ti langis nga itultuloy ti ag-order iti produkto a petrolyo laksid a ngimmato ti presyo, ken makisar-sarita da iti dadduma a pagilian iti Asya tapno masiguro a saan a maibusan ti suplay iti Pilipinas.
Siniguro ni Sec. Garin nga adu ti option wenno alternatibo a pagtaudan ti suplay ti langis iti pagilian.
Kagiddan daytoy, inallokoy ti opisyal iti publiko nga agsalimetmet iti panagusar ti kuryente tapno mabalanse iti demand dagiti produkto a petrolyo ken nabalakadan iti publiko a saan nga agidulin ti produkto a petrolyo iti balay agsipudta delikado ken saan a natalged daytoy.
Iti biang ti gobyerno, immunan nga immandar ni President Ferdinand Marcos Jr. kadagiti ahensiya nga adaptaren iti uppat nga aldaw a serrek iti trabaho iti makalawas tapno makissayan iti makonsumo ken gastos iti kuryente ken langis.
