Imbatad ni Oil Industry Management Bureau Dir. Rino Abad nga umabot iti 213 gasoline stations iti eneksamenda iti naisayangkat nga inspeksyon idi Nobyembre 10 agingga 13, nu sadino a 114 kaadgitoy ti natakuatan a saan a nangipatungpal iti umno a kissay-presyo.

Segun iti ahensya, imbes nga ibaba ti presyo iti naipatungpal a pannakakissay ket kurang wennu saan a maitunos ti presyo nga impatungpal ti sumagmamano nga estasyon.

Kinunana pay a personalda nga eneksamen ti 97 kadagiti gasoline stations tapnu masigurado a masurot ti direktiba. idi Biyernes, pormalen a nai-endorso ti grupo ti inspection report iti legal department ti DOE para iti maiyannatop a legal action.

Kagiddan iti daytoy, nagtaripnong pay idi Biyernes dagiti field offices ken legal services tapnu adalen dagiti agbalin nga addang ken kadagiti maipila a kaso . Segun iti ahensya, dua a kangrunaan a linteg ti usarenda iti panagadal kadagiti dokumento nu kas bilang dumanon iti pormal na demanda dagiti panaglabsing.

Iti umuna ket iti Oil Regulation Law nu sadino a saan a nasurot ti mandated price adjustment ken addaan iti dusa iti korte a tallo bulan agingga maysa tawen a pannakaibalud ken multa a 50,000 agingga 300,000 pesos.

Maikadua ti Presidential Decree 1865, partikular iti Section 2(E) kontra iti overpricing ti petroleum products. iti sidong iti daytoy, dagiti naglabsing ket sumango iti administrative fine a 10,000 pesos, suspensyon wennu pannakabawi ti permit, kasta metten iti criminal penalty a 20,000 agingga 50,000 pesos ken pannakaibalud a iti dua agingga lima a tawen.

kas paset iti proseso, inikkan ti ahensiya ti 72 oras dagiti nasao nga estasyon tapnu mangipasa iti palawag babaen iti show cause order. Kaaduan a panangikalinteganda dagitoy ket ti pannaka-stock dagiti produkto a naala iti nangatngato a presio manipud kadagiti mother companies idi napan a lawas.

Nupay kasta, inlawlawag ti ahensia a napagsasaritaanen daytoy kadua ti legal services ken oil companies, nu sadino a mapagnunumuan nu kasatno a mapalubosan ti panagngato ti presio nu bilang ngumina ti produkto, isu a rumbeng met nga ipatungpal ti panagkissay ti presyo nu adda iti price rollback.

Nangipatungpal manen ti Department of Energy (DOE) idi Martes ti sabali pay a rollback ti presio dagiti produkto petrolyo babaen ti pannakakissay ti 1.50 pesos kada litro ti gasolina, 3.80 pesos para iti diesel, ken 5.80 pesos para iti kerosene.